Fränggische Piratenoma

"Des is fei nedd von dena Audonoma,"

socht die Oma vom Koarl.

"Woos maansd ?"

frooch iich dann die Oma vom Koarl....

"Die zündn jetzt nimmer die Audos von die Leud oo! Die zündn jetzt die Bohn vom Stood oo! Grood schöö is des, wenn der Stood amol geärcherd wed! Der Stood ärched uns die ganza Zeid und etzed ärchern die Audonoma den Stood!"

soochd die Oma vom Koarl und grinsd dabai.

"Ja,"

soch iich,

"Oma, sbinsd etzed und di Leud, in der Boahn, Oma, wos is mid denna, wenn denna wos bassierd? Host etzed ganz an Vogel, Oma?"


"Na, die solln midm Rod foarn. Oder laafn, des hom mir früher a scho gmacht,"


sochd die Oma vom Koarl.


Do is mir dann der Grong geblatzt.

"Na du blöda Kuh, du grichst dei Rendn und du mussd nedd zur Erbed foahrn und du wohnsd do in Franggn und hosd es woarm und mussd nedd friern, brauchd ka Audo und ka Boahn, du konnsd schöö redn. Du fliechsd a nedd in die Lufd wie die Leudd in Berlin. Des gedd nedd um den debbedn Stood. Es gedd um die Audonoma in Berlin. Die wolln unsern schöna Stood kapudd machn Oma. Verstesd du des nedd? Mir brauchn den Stood numoll"


Grod glachd hod sie die Oma vom Koarl, als iich des gsochd hob. Warum, des hod sie mir dann erklärt.

"Des versteh ich scho. Aber der Stood is doch scho kapudd, wos wolln die do nu kapudd machn. Mei Bübla, mach du den Griech midd, so wie iich. Iich bin etzed 75 Joahr old. Wecha mir könna di ruich den Stood ärchern. Iich hob mei Lehm long geerberd und wos hob iich davoo? Mei Vadder is gfolln, mei Mudder hod bloß geerberd, iich aa und a Rendn hob iich trotzdem fast kanna gricht. Iich hob drei Kinner aufgezoong und des sin anständicha Leud worn. A haufn Rendn grieng bloss die annern. Warum? Des waas iich need. Do mussd dein blödn Stood froong. Wenn iich zum Dokter geh, dann muss iich alles selber zoolln.Des Essen im Subbermargd wedd immer deurer. Wos sochd do dei Stood dazu? Nix. Wos will iich von dem Stood? Aa nix. Des is guud, wenns moll widder a Revolution gibt."


socht die Oma vom Koarl.

Und dann setzt sie ihr Biratenmützla auf und gedd naus auf ihr Rood und fährd davoo...

"Mei"


hob ich mir docht,

"die Oma vom Koarl wedd doch ned a zu die Biraden ganga sei??"


Angelika Demel